ALA 15.01.2021

Aktuell Informatiounen zur Covid-19-Gestioun an eise Strukturen (Stand: 30.7.2021)

Impfstrategie

D’Lëtzebuerger Alzheimer Associatioun schléisst sech der Empfeelung vum Gesondheetsministère un a rifft weiderhin op, dass d’Mataarbechter sech sollen impfe loossen. Si ass der Meenung, dass déi Leit, déi am Fleegesecteur schaffen net nëmmen d’Verantwortung hu fir sech selwer, mee och fir all déi Leit, déi si betreien. Sech impfe loossen ass deen eenzege Wee eraus aus dëser Pandemie a virun allem ass et e Geste vu Solidaritéit a vu perséinlecher Responsabilitéit.

Fir iwwer d’Impfung ze informéieren an ze sensibiliséieren, hu 4 Mataarbechter d’Roll vum Impfambassadeur bei der ala ugeholl. Hir Missioun ass et:

  • Sech reegelméisseg iwwer d’Impfungen um Lafenden halen
  • De Mataarbechter bei Froen zur Verfügung ze stoen
  • D’Personal ze encouragéiere fir sech impfen ze loossen
  • D’Propagatioun vu Falschinfomatiounen ze verhënneren

Wunn- a Fleegeheem « Beim Goldknapp »

Dat neit Covid-Gesetz ass den 13. Juni 2021 offiziell a Kraaft getrueden a säit dem 14. Juni 2021 ginn déi nei Dispositiounen an eisem Wunn- a Fleegeheem ungewannt.

Eng vun den neie Moossnamen ass de “Régime CovidCheck”, deen eis erlaabt all Persounen, déi am Kontakt mat eise Bewunner sinn, ze kontrolléieren fir ze kucken ob si geimpft, geheelt oder getest sinn.

Virun all Besuch musst Dir Iech dëser Kontroll ënnerzéien, déi wärend de Besuchszäiten vun engem Mataarbechter aus dem Accueil ausgefouert gëtt a wéi folgend gereegelt ass:

  • Dir mellt Iech am Accueil un.
  • Dir gitt gefrot ob Dir bei Ärer Visitt enke Kontakt mat engem Bewunner hutt:
    • Ass dëst de Fall, musst Dir Iech engem “Régime CovidCheck” ënnerzéien.
    • Ass dëst net de Fall, dann dierft Dir ouni “Régime CovidCheck” an d’Gebai eran.

D’Besuchszäiten bleiwen onverännert: vu méindes bis sonndes tëschent 9.30 an 11.45 Auer an tëschent 15.00 a 17.15 Auer.

De Besuchsformulaire muss weiderhin ausgefëllt ginn an Dir musst Äre Rendez-vous wéi bis elo op mannst 24 Stonnen am Viraus ufroen iwwert d’Telefonsnummer 26 007-1. Jeeweils 2 Famille kënne gläichzäiteg op Besuch an e Wunnberäich kommen. Pro Besuch sinn 2 Persounen zougelooss.

Wann Dir keen Zertifikat (geimpft, geheelt oder getest) hutt, musst Dir en Auto-Test op der Plaz maachen. Wann Äre Selbsttest positiv ass, da kënnt Dir net an d’Haus op Besuch kommen. Äert Resultat musst Dir deklaréieren iwwert den Internet Site Coronavirus (public.lu).

E Freideg, dne 30. Juli ass erëm e Large Scale Testing virgesinn.

Ambulant Déngschter a Strukturen

Déi ambulant Strukture bei der ala hu säit dem Ufank vun der Covid-19-Pandemie net opgehal hir Déngschter a Servicer unzebidden. All d’Antenne vun eisem Hëllefs- a Fleegedéngscht doheem fonctionéiere mat engem verstäerkten Hygièneskonzept weider. D’Hygièneskonzept vun eisen Dagesfoyeren ass esou opgebaut, dass mer manner Dagesgäscht pro Foyer betreie fir e Maximum vu Sécherheet kënnen ze garantéieren. Sou kënne mer déi betraffe Mënschen an hir Famille weiderhin ënnerstëtzen.

D’Foyere vun der ala fonctionéieren de Moment normal. Mir maachen d’Famille just drop opmierksam, dass keen Dagesgaascht an de Foyer dierf komme wann hien oder en aner Familljemember positiv getest gouf.

Dat neit Covid-Gesetz ass den 13. Juni 2021 offiziell a Kraaft getrueden. Eng vun de neie Moossnamen ass de sougenannte “Régime CovidCheck”. Dëst bréngt mat sech, dass d’ala a senge Strukturen all Persounen – Personal an Dagesgäscht abegraff – muss kontrolléieren fir ze kucken ob eng vu folgende Konditiounen erfëllt ass:

  • Noweis vun enger kompletter Covid-19-Impfung
  • Noweis, dass ee vun enger Covid-19-Erkrankung geheelt ass (dierf net méi al wéi 6 Méint sinn)
  • Noweis vun engem gültege Covid-Test:
    • PCR-Test, deen net méi wéi 72 Stonnen al ass
    • Schnelltest, deen net méi wéi 48 Stonnen al ass

Wann en Dagesgaascht nach net ganz geimpft ass oder e kann oder wëllt sech net impfe loossen, da maache mir en Antigentest bei senger Arrivée am Foyer, esou wéi dat am Gesetz steet. Wann dësen Test positiv ass, da kann den Dagesgaascht net an de Foyer kommen a mir deklaréieren d‘Resultat op covidtracing.public.lu. Duerch streng Hygiènes- a Sécherheetsmesuren bleift den Encadrement vun eisem Hëllefs- a Fleegedéngscht doheem ëmmer nach méiglech.

Mir féieren de CovidCheck vum 1. Juli un fir d’Dagesgäscht aus eise Foyeren an.

Berodungsdéngschter

De Sozial- a Koordinatiounsdéngscht, de psychologeschen Déngscht an den therapeuteschen Déngscht bidde weiderhin mat engem verstäerkten Hygièneskonzept hir Ënnerstëtzung un.

Coursen a Berodungsservicer vun der ala

Den 28. Juli vu 15.00 bis 16.30 Auer fënnt déi nächst Trauerronn am Wunn- a Fleegeheem “Beim Goldknapp” statt. An dëser Trauerronn hutt Dir d’Méiglechkeet iwwer Är Trauer ze schwätzen an Iech mat Leit an enger änlecher Liewenssituatioun auszetauschen. D’Participatioun un der Trauerronn ass gratis. Wann Dir Froen hutt oder wëllt un der Trauerronn deelhuelen, da mellt Iech gären ënnert der Nummer 26 007-1.

De Familljekrees fënnt all 2. Dënschdeg am Mount vu 15.00 bis 16.30 Auer am Wunn- a Fleegeheem zu Ierpeldeng statt.

D’Selbsthëllefgrupp fënnt erëm all 1. Donneschdeg am Mount vu 14.00 bis 15.30 Auer zu Dummeldeng am Sëtz vun der ala (45, rue Nicolas Hein).

Weider Informatiounen iwwert eis Coursë kritt Dir op eisem Internetsite an ënnert der Nummer 26 007-1.