ALA 15.01.2021

Aktuell Informatiounen zur Covid-19-Gestioun an eise Strukturen (Stand: 14.6.2021)

Impfstrategie

D’Lëtzebuerger Alzheimer Associatioun schléisst sech der Empfeelung vum Gesondheetsministère un a rifft weiderhin op, dass d’Mataarbechter sech sollen impfe loossen. Si ass der Meenung, dass déi Leit, déi am Fleegesecteur schaffen net nëmmen d’Verantwortung hu fir sech selwer, mee och fir all déi Leit, déi si betreien. Sech impfe loossen ass deen eenzege Wee eraus aus dëser Pandemie a virun allem ass et e Geste vu Solidaritéit a vu perséinlecher Responsabilitéit.

Fir iwwer d’Impfung ze informéieren an ze sensibiliséieren, hu 4 Mataarbechter d’Roll vum Impfambassadeur bei der ala ugeholl. Hir Missioun ass et:

  1. Sech reegelméisseg iwwer d’Impfungen um Lafenden halen
  2. De Mataarbechter bei Froen zur Verfügung ze stoen
  3. D’Personal ze encouragéiere fir sech impfen ze loossen
  4. D’Propagatioun vu Falschinfomatiounen ze verhënneren

Wunn- a Fleegeheem „Beim Goldknapp“

Dat neit Covid-Gesetz ass den 13. Juni 2021 offiziell a Kraaft getrueden. Aus organisatoresche Grënn hu mir decidéiert déi entspriechend Dispositiounen ab e Méindeg, de 14. Juni 2021, an eisem Wunn- a Fleegeheem “Beim Goldknapp” unzewennen.

Eng vun de neie Moossnamen ass de sougenannte “Régime CovidCheck”. Dëst bréngt mat sech, dass d’ala a senge Strukturen all Persounen – Personal a Familljememberen abegraff – déi am Kontakt mat eise Bewunner sinn, muss kontrolléieren fir ze kucken ob eng vu folgende Konditiounen erfëllt ass:

  • Noweis vun enger kompletter Covid-19-Impfung
  • Noweis, dass ee vun enger Covid-19-Erkrankung geheelt ass (dierf net méi al wéi 6 Méint sinn)
  • Noweis vun engem gültege Covid-Test:
    • PCR-Test, deen net méi wéi 72 Stonnen al ass
    • Schnelltest, deen net méi wéi 48 Stonnen al ass

Am Wunn- a Fleegeheem “Beim Goldknapp” bleiwen d’Besuchszäiten onverännert: vu méindes bis sonndes tëschent 9.30 an 11.45 Auer an tëschent 15.00 a 17.15 Auer.

Virun all Besuch muss Dir Iech bis op Weideres där uewen erkläerter Kontroll ënnerzéien. Dës Kontroll gëtt wärend de Besuchszäiten duerch eis Mataarbechter aus dem Accueil ausgefouert an ass wéi folgend gereegelt:

  • Dir mellt Iech am Accueil un.
  • Dir gitt gefrot ob Dir bei Ärer Visitt enke Kontakt mat engem Bénéficiaire (an dësem Fall Bewunner) hutt:
    • Ass dëst de Fall, musst Dir Iech engem „Régime CovidCheck“ ënnerzéien. Dësen Check gëtt vum jeeweilege Kontroller (an dësem Fall den Accueil-Mataarbechter) ausgewäert.
    • Ass dëst net de Fall, dann dierft Dir ouni „Régime CovidCheck“ an d’Gebai eran.

Mir maachen drop opmierksam, dass de Besuchsformulaire weiderhi muss ausgefëllt ginn an dass Dir Äre Rendez-vous wéi bis elo op mannst 24 Stonnen am Viraus musst ufroen iwwert d’Telefonsnummer 26 007-1. Jeeweils 2 Famille kënne gläichzäiteg op Besuch an e Wunnberäich kommen. Pro Besuch sinn 2 Persounen zougelooss.

Mir bieden Iech Ären Zertifikat (Geimpft, Geheelt oder Getest) matzebréngen (op Pabeier oder als Foto op Ärem Smartphone) esou wéi Är Identitéitskaart. Wann Dir keen Zertifikat hutt, musst Dir en Auto-Test op der Plaz maachen. D’Tester ginn Iech weiderhin vun der ala zur Verfügung gestallt, nei ass awer, dass mir Iech keen Test méi kënne mat Heem ginn. Wann Äre Selbsttest positiv ass, da kënnt Dir net an d’Haus op Besuch kommen. Äert Resultat musst Dir deklaréieren iwwert den Internet Site Coronavirus (public.lu).

Ambulant Déngschter a Strukturen

Déi ambulant Strukture bei der ala hu säit dem Ufank vun der Covid-19-Pandemie net opgehal hir Déngschter a Servicer unzebidden. All d’Antenne vun eisem Hëllefs- a Fleegedéngscht doheem fonctionéiere mat engem verstäerkten Hygièneskonzept weider. D’Hygièneskonzept vun eisen Dagesfoyeren ass esou opgebaut, dass mer manner Dagesgäscht pro Foyer betreie fir e Maximum vu Sécherheet kënnen ze garantéieren. Sou kënne mer déi betraffe Mënschen an hir Famille weiderhin ënnerstëtzen.

D’Foyere vun der ala fonctionéieren de Moment normal. Mir maachen d’Famille just drop opmierksam, dass keen Dagesgaascht an de Foyer dierf komme wann hien oder en aner Familljemember positiv getest gouf.

De 15. Abrëll 2021 ass eng nei Ordonnance vun der Direktioun vum Gesondheetsministère a Kraaft getrueden. Dës recommandéiert, dass all Dagesgaascht aus de Foyeren an all Client vun den Hëllefs- a Fleegedéngschter sech soll reegelméisseg (op mannst 2 Mol an der Woch) op de Covid-19 teste mat engem Schnelltest, Selbsttest oder PCR-Test.

Aus organisatoresche Grënn, recommandéiert d’ala e Selbsttest fir d’Dagesgäscht a Clienten. Sollten d’Ëmstänn et awer verlaangen, kann e Schnell- oder PCR-Test jee no Situatioun vu geschoultem Personal gemaach ginn. De Selbsttest gëtt prinzipiell vun der Persoun selwer oder mat der Hëllef vun sengem Aidant doheem gemaach. D’Material fir de Selbsttest kënnt Dir beim jeeweilege Responsabel ufroen fir selwer doheem ze maachen.

Wann den Test vun Ärem Familljemember positiv ass, da kann en net an de Foyer kommen an Dir informéiert de Responsabel vum jeeweilegen Dagesfoyer respektiv de jeeweilege Referenz-Infirmier vun ala plus. Äert Resultat musst Dir deklaréieren iwwert den Internet Site Coronavirus (public.lu).

D‘Ordonnance vun der Direktioun vum Gesondheetsministère kënnt Dir hei liesen: Ordonnance du Directeur de la Santé.

Dat neit Covid-Gesetz ass den 13. Juni 2021 offiziell a Kraaft getrueden. Eng vun de neie Moossnamen ass de sougenannte “Régime CovidCheck”. Dëst bréngt mat sech, dass d’ala a senge Strukturen all Persounen – Personal a Familljememberen abegraff – déi am Kontakt mat eise Bewunner sinn, muss kontrolléieren fir ze kucken ob eng vu folgende Konditiounen erfëllt ass:

  • Noweis vun enger kompletter Covid-19-Impfung
  • Noweis, dass ee vun enger Covid-19-Erkrankung geheelt ass (dierf net méi al wéi 6 Méint sinn)
  • Noweis vun engem gültege Covid-Test:
    • PCR-Test, deen net méi wéi 72 Stonnen al ass
    • Schnelltest, deen net méi wéi 48 Stonnen al ass

Berodungsdéngschter

De Sozial- a Koordinatiounsdéngscht, de psychologeschen Déngscht an den therapeuteschen Déngscht bidde weiderhin mat engem verstäerkten Hygièneskonzept hir Ënnerstëtzung un.

Coursen a Berodungsservicer vun der ala

De 15. Juni vu 15.00 bis 16.30 Auer fënnt déi nächst Trauerronn am Wunn- a Fleegeheem “Beim Goldknapp” statt. An dëser Trauerronn hutt Dir d’Méiglechkeet iwwer Är Trauer ze schwätzen an Iech mat Leit an enger änlecher Liewenssituatioun auszetauschen. D’Participatioun un der Trauerronn ass gratis. Wann Dir Froen hutt oder wëllt un der Trauerronn deelhuelen, da mellt Iech gären ënnert der Nummer 26 007-1.

De Familljekrees fënnt all 2. Dënschdeg am Mount vu 15.00 bis 16.30 Auer am Wunn- a Fleegeheem zu Ierpeldeng statt.

Den éischte Cours fir betraffe Famillje fënnt de 16. Juni 2021 vun 9.00 bis 16.00 Auer am Foyer « Villa Reebou » zu Diddeleng statt.

D’Selbsthëllefgrupp fënnt erëm all 1. Donneschdeg am Mount vu 14.00 bis 15.30 Auer zu Dummeldeng am Sëtz vun der ala (45, rue Nicolas Hein).

Weider Informatiounen iwwert eis Coursë kritt Dir op eisem Internetsite an ënnert der Nummer 26 007-1.